GATHUTKACA LAIR
Sawijining dina, Raden
Werkudara, Prabu Kresna, lan satriya Pringgodani nyoba medhot tali puser anake Werkudara kang aran Jabang Tutuka. Ning sakehe gamane para satria, kalebu gamane Prabu Kresna
Cakrabaswara ora bisa
medhot tali pusere Jabang Tutuka. Mula saka pituduhe Hyang Akarya Jagad,
Raden Arjuna diutus dening Prabu
Kresna supaya menyang kayangan, saperlu nyilih gaman Kunto Wijayandanu kagungane Bathara
Guru.
Lakune
Raden Arjuna ora lancar. Jebule, gaman kang aran Kunta Wijayandanu
kedhisikan digawa Raden Karna. Banjur Raden Arjuna marani Raden Karna, kang ora
liya saktemene isih sedulure dhewe saka ibu Kunthi, ning Raden Arjuna ora
mangerteni.
Raden
Arjuna meksa gaman utawa pusaka iku kudu diwenehke, ning Raden Karna ora gelem
nuruti karepe. Wekase, raden Arjuna perang tandhing lawan Raden Karna. Raden
Arjuna ngetokake sakabehe kanuragan, lan kawasisane babagan ilmu kanuragan
kanggo ngalahake Raden Karna. Geni kang muncrat saka pusakane kakarone kaya
kilat, swarane pedhang lan bengok swarane satriya loro prasasat bisa agawe
horoge jagad. Ning emane, Raden Arjuna jebul ora bisa menangake perang tandhing
iku.
“Wis, wis! Arjuna! wis! aja
diteruske, mung atase pusaka iki, mosok kowe arep adol nyawamu?” ature Raden
Karna.
“Ngertiya Raden Karna, gaman pusaka
iku penting kanggoku, amarga tali pusere ponakanku si Jabang Tutuka, ora bisa
dipedhot nganggo gaman apa wae. Kang bisa medhot, ya mung gaman iku.”
“Yen mangkono, aku mung bisa menehi
warangkane, nyoh tampanana,” sabanjure menehake warangka Kunta Wijayandanu,
banjur Raden Karna mlayu kepas kaya angin.
Satekane Pringgodani, Raden Arjuna ngaturake warangka Kunta
Wijayandanu marang Prabu Kresna. Dening Prabu Kresna, warangka mau dicoba
kanggo medhot tali pusere Jabang Tutuka. Jebul, mung nganggo warangka, tali
pusere bisa pedhot. Jabang Tutuka digawa menyang kayangan Dening Prabu Kresna,
Jabang Tutuka diutus merangi Naga Percona, emane Jabang Tutuka kalah lan nekani
pati. Ning amarga welase Bathara Guru, Jabang Tutuka diuripke maneh kanthi
sarat dicemplungake ing kawah Candradimuka. Nalika Jabang Tutuka ana ing njero
kawah, saakehe gaman pusakane satria lan dewa kayangan pada bebarengan meu
dicemplungake. Mula nalika mentas saka kawah iku, Jabang Tutuka malih rupa kaya
satriya kang gagah prakasa lan antuk juluk anyar yaiku Gathotkaca.
Komentar
Posting Komentar